ஈப்போ,மார்ச் 4-
இந்து மதத்தை வெளிப்படையாக இழிவுபடுத்தும் வகையில் எரா எஃப்எம் வெளியிட்ட காணொளி கண்டிக்கத்தக்கது என்று பிகேஆர் பேராக்கின் துணைத் தலைவர் நோவிந்தேன் கிருஷ்ணன் கூறினார்.
இத்தகைய செயல்கள் மிகவும் அவமரியாதையானது மட்டுமல்ல, மலேசியாவில் உள்ள பல்லீன மற்றும் பல மத சமூகத்தின் நம்பிக்கைக்கு முரணானதாக உள்ளது. மத நம்பிக்கைகள் மிகவும் தனிப்பட்ட விஷயமாகும். ஆகையால் அவை மரியாதையுடனும் உணர்திறனுடனும் நடத்தப்பட வேண்டும் என்று நோவிந்தன் கேட்டுக் கொண்டார்.
இந்து மத நடைமுறைகளை கண்மூடித்தனமான மற்றும் அவமதிக்கும் வகையில் சித்தரிப்பது மலேசியாவில் உள்ள இந்து சமூகத்தின் உணர்வுகளை புண்படுத்தியுள்ளது மற்றும் நமது நாட்டின் அடிப்படையான ஒற்றுமை மற்றும் நல்லிணக்கக் கொள்கைக்கு எதிரானதாக உள்ளது என்று நோவிந்தன் தெளிவுபடுத்தினார்.
இந்த விவகாரம் தொடர்பாக தேசிய ஒருமைப்பாட்டு அமைச்சர் டத்தோ ஆரோன் அகோ டகாங்கின் அறிக்கைக்கு ஆதரவாகவும், இதுபோன்ற சம்பவங்கள் மீண்டும் நடக்காமல் இருப்பதை உறுதி செய்வதாகவும் நான் உறுதியாக நம்புகிறேன்.
அனைத்து ஊடகங்களும் தங்கள் உள்ளடக்கத்தில் அதிக பொறுப்புணர்வு மற்றும் கலாச்சார உணர்திறன் காட்டுவது முக்கியம்.
தகவல் தொடர்பு மற்றும் பல்லூடகச் சட்டத்தின் கீழ் மலேசிய தகவல் தொடர்பு மற்றும் பல்லூடக ஆணையம் (MCMC) உட்பட சம்பந்தப்பட்ட அதிகாரிகள், இந்த சம்பவம் குறித்து முழுமையான விசாரணை நடத்தி, மலேசியாவில் உள்ள அனைத்து மத சமூகங்களின் கண்ணியத்தையும் மரியாதையையும் பாதுகாக்க உரிய நடவடிக்கை எடுக்குமாறு கேட்டுக்கொள்கிறேன்.
இந்த நேரத்தில், அனைத்து மலேசியர்களிடையே புரிந்துணர்வையும் மரியாதையையும் வளர்ப்பதற்கு ஒன்றிணைந்து செயல்படுவோம், எந்த வகையான மதவெறி அல்லது உணர்வின்மையையும் நிராகரிப்போம் என்று
நோவிந்தேன் கிருஷ்ணன் குறிப்பிட்டுள்ளார்.
