தாமான் பொந்தியான் ஜெயா கே.ஆர்.டி-யின் புதிய தன்னார்வ ரோந்துத் திட்ட (SRS) சிற்றறை திறப்பு விழா துணையமைச்சர் யுனேஸ்வரன் திறந்து வைத்தார்!

பெந்தியான்,ஏப்.21- சமூகப் பாதுகாப்பு மற்றும் ஒற்றுமையை வலுப்படுத்துகிறது
தேசிய ஒற்றுமைத் துறை துணை அமைச்சர் யுனேஸ்வரன் ராமராஜ், பொந்தியான் மாவட்டத்திலுள்ள தாமான் பொந்தியான் ஜெயா கே.ஆர்.டி-க்கு (KRT Taman Pontian Jaya) மேற்கொண்ட வருகையின் போது, அங்குள்ள புதிய தன்னார்வ ரோந்துத் திட்ட (SRS) சிற்றறையை அதிகாரப்பூர்வமாகத் திறந்து வைத்தார். இந்நிகழ்வில் தேசிய ஒற்றுமை மற்றும் ஒருங்கிணைப்புத் துறையின் (JPNIN) துணைத் தலைமை இயக்குநர் (மேலோட்டமானத் திட்டமிடல்) திரு. நோர்சாஹிருடின் அமின் பின் ஹுசின்; ஜோகூர் மாநில JPNIN இயக்குநர் திருமதி ஹாஜா நூருல் அக்மாலினா பிந்தி ஹாஜி ஷம்சுடின்; மற்றும் தாமான் பொந்தியான் ஜெயா கே.ஆர்.டி தலைவர் துவான் ஹாஜி காட்னி பின் சபாரி ஆகியோர் கலந்து கொண்டனர். இந்தப் புதிய SRS சிற்றறையின் திறப்பு விழா, தேசிய ஒற்றுமை அமைச்சின் முயற்சிகளில் ஒரு முக்கிய மைல்கல்லாகும். அண்டை வீடுகளின் பாதுகாப்பை மேம்படுத்துவதற்கும், தன்னார்வத் தொண்டு உணர்வை விதைப்பதற்கும், சமூக ஒத்துழைப்பை வலுப்படுத்துவதற்கும், பல்லின மக்களிடையே ஒற்றுமையை வளர்ப்பதற்கும் ஒரு முக்கியமான ஊடகமாகத் தன்னார்வ ரோந்துத் திட்டத்தை (SRS) இது மேலும் வலுப்படுத்தும். தாமான் பொந்தியான் ஜெயா கே.ஆர்.டி-யினர் ‘பெர்டிகேஷன்’ (Fertigasi) முறையில் காய்கறித் தோட்டங்களை வெற்றிகரமாகச் செயல்படுத்தி வருவதைப் பாராட்டிய யுனேஸ்வரன் ராமராஜ், இது ‘ஆர்.டி புரோகிரசிவ்’ (RT Progresif) திட்டத்தின் முக்கியத் தூண்களில் ஒன்றான ‘பொருளாதாரம் மற்றும் வாழ்வாதாரம்’ என்பதோடு ஒத்துப்போவதாகக் குறிப்பிட்டார். கே.ஆர்.டி என்பது பாதுகாப்பு மற்றும் ஒற்றுமைக்கானது மட்டுமல்லாமல், சமூக நலன், வாழ்வாதார மேம்பாடு மற்றும் நிலையான உள்ளூர் வளர்ச்சி ஆகியவற்றிற்கும் ஒரு ஊக்கியாக அமையும் என்பதை இந்த முயற்சி நிரூபித்துள்ளது. தாமான் பொந்தியான் ஜெயா கே.ஆர்.டி செயற்குழுவினர் மற்றும் அப்பகுதி குடியிருப்பாளர்களின் அர்ப்பணிப்பு, முயற்சி மற்றும் முனைப்பான செயல்பாடுகளுக்குத் துணை அமைச்சர் தனது மனமார்ந்த பாராட்டுகளையும் வாழ்த்துகளையும் தெரிவித்துக் கொண்டார். இந்த வெற்றி நாடு முழுவதும் உள்ள மற்ற கே.ஆர்.டி-களுக்கு ஒரு சிறந்த முன்மாதிரியாக அமையும் என்று அவர் நம்பிக்கை தெரிவித்தார். இனம், மதம் கடந்து ஒற்றுமை, பாதுகாப்பு மற்றும் சமூக நலனை வலுப்படுத்தும் முயற்சிகளில் பொதுமக்கள் அனைவரும் தங்களை ஆக்கப்பூர்வமாக ஈடுபடுத்திக் கொள்ள வேண்டும் என்றும், தாமான் பொந்தியான் ஜெயா கே.ஆர்.டி காட்டும் உத்வேகத்தையும் சுறுசுறுப்பையும் அனைவரும் பின்பற்ற வேண்டும் என்றும் அவர் கேட்டுக்
கொண்டார்.