பெரிக்காத்தான் நேஷனல் கூட்டணிக்கு அனுப்பப்பட்டது ‘சேரும் விண்ணப்பம்’ அல்ல! தகவல் கோரும் கடிதம் ம.இ.கா விளக்கம்

கோலாலம்பூர், டிச.1-

பெரிக்காத்தான் நேஷனல் கூட்டணிக்கு அனுப்பப்பட்ட கடிதம் அதில் இணைவதற்கான அதிகாரப்பூர்வ விண்ணப்பம் அல்ல, மாறாக அந்தக் கட்சி ஏதேனும் ஒரு முடிவை எடுப்பதற்கு முன்னர், ஆரம்பக்கட்டத் தகவல்களைப் பெறுவதற்காகவே பெரிக்கத்தான் நேஷனலுக்கு கடிதம் அனுப்பப்பட்டதாக மலேசிய இந்தியக் காங்கிரஸ் தெளிவுபடுத்தியுள்ளது. PN-இன் நிலைப்பாட்டை ஆழமாகப் புரிந்துகொள்ளும் நோக்கிலேயே, கட்சியின் ஆண்டுப் பொதுச் சபைக் கூட்டத்திற்கு (AGM) நான்கு நாட்களுக்கு முன்னர் அந்தக் கடிதம் அனுப்பப்பட்டதாகத் ம.இ.கா பொதுச் செயலாளர் எஸ். அனந்தன் தெரிவித்தார். “அது PNஇல் சேருவதற்கு முன்னரான ஒரு விளக்கத்தைக் கோருவதற்கான கடிதம். அதன் உள்ளடக்கம், PN-இன் உறுப்புரிமை வடிவம், இணைவதற்கான செயல்முறை மற்றும் PN-இன் அங்கமாக ம.இ.கா ஏற்றுக் கொள்ளப்பட்டால் அதன் நிலைப்பாடு ஆகியவை உட்படப் பல முக்கியமான பிரச்சினைகளில் கவனம் செலுத்துகிறது,” என்று மலேசியாகினிக்கு அளித்த பேட்டியில் டத்தோ ஆனந்தன் அவ்வாறு கூறினார். PN தலைவர் முஹைதீன் யாசின், ம.இ.கா கூட்டணியில் சேர அதிகாரப்பூர்வமாக விண்ணப்பித்துள்ளதாக முன்னதாகக் கூறியிருந்த கருத்துக்குப் பதிலளிக்கும் விதமாக அனந்தன் இவ்வாறு விளக்கமளித்தார். PAS-இன் அழைப்பும் தெளிவுபடுத்தும் தேவையும்

PAS துணைத் தலைவர் துவான் இப்ராஹிம் துவான் மான் உட்படப் பல PAS தலைவர்கள், ம.இ.காவை கூட்டணி விவாதம் நடத்துமாறு அழைத்ததைத் தொடர்ந்தே இந்தக் கடிதம் அனுப்பும் நடவடிக்கை மேற்கொள்ளப்பட்டதாகவும் அனந்தன் விளக்கினார். இந்தியச் சமூகத்தின் மேம்பாடு, கல்விப் பிரச்சினைகள், சமூக-பொருளாதார மேம்பாடு மற்றும் அரசியல் பிரதிநிதித்துவம் உள்ளிட்ட விவகாரங்களில் PN-இன் அர்ப்பணிப்பு குறித்துக் கூடுதல் தெளிவை ம.இ.கா கோரியுள்ளதாகவும் அவர் தெரிவித்தார். “கட்சியின் திசையைப் பற்றிய முக்கியமான முடிவை எடுப்பதற்கு முன் எங்களுக்கு முழுமையான தகவல் தேவை. ம.இ.கா தானாகவே ஏற்றுக்கொள்ளப்படுமா அல்லது பூர்த்தி செய்யப்பட வேண்டிய குறிப்பிட்ட நிபந்தனைகள் ஏதேனும் இருக்குமா என்பதையும் நாங்கள் உறுதிப்படுத்த விரும்புகிறோம். இந்தக் கடிதமே இறுதி முடிவை எடுப்பதற்கு மிகவும் அவசியம்,” என்றும் அனந்தன் சொன்னார். முன்னதாக, PN-இல் சேர MIC விண்ணப்பத்தைச் சமர்ப்பித்ததாக முஹைதீன் கூறியதாகவும், PN உச்சமன்றம் டிசம்பரில் இதைப் பரிசீலித்து அதிகாரப்பூர்வ முடிவை எடுக்கும் என்றும் ஒரு இணையதளம் செய்தி வெளியிட்டிருந்தது. இந்த ஆண்டு நடைபெற்ற ம.இ.காவின் AGM கூட்டத்தில், கட்சி BN-இல் தொடர்வதா அல்லது புதிய கூட்டணியைக் கருத்தில் கொள்வதா என்ற முடிவைத் தற்காலிகமாக ஒத்திவைக்க முடிவு செய்யப்பட்டது. கட்சித் தலைவர் தான்ஸ்ரீ ச. விக்னேஸ்வரன் மற்றும் மத்திய செயலவைக் குழுவிடம் (CWC) முடிவெடுக்கும் அதிகாரம் ஒப்படைக்கப்பட்டது. AGM-க்குப் பிந்தைய ஊடகச் சந்திப்பில் பேசிய விக்னேஸ்வரன், BN-ஐ விட்டு விலகும் வாய்ப்பு திறந்தே உள்ளது என்பதைச் சுட்டிக்காட்டி, MIC-யின் இறுதி முடிவு கட்சித் தலைமையையே சார்ந்துள்ளது என்று கூறியிருந்தது குறிப்பிடத்தக்கது.