16 வயதிற்குட்பட்டோர் சமூக ஊடகங்களைப் பயன்படுத்தத் தடை மலேசிய அரசின் புதிய சட்டம் ஒரு ‘தடுப்பு முன்னுதாரணம்’!
பெட்டாலிங் ஜெயா, டிச.17- 16 வயதிற்குட்பட்ட சிறார்கள் சமூக ஊடகங்களைப் பயன்படுத்துவதைக் கட்டுப்படுத்தும் மலேசிய அரசின் முன்மொழிவு மற்றும் 2025 ஆன்லைன் பாதுகாப்புச் சட்டம் (OnSA) அமலாக்கம் ஆகியவை, சிறுவர் பாலியல் வன்கொடுமைப் பொருட்களை (CSAM) ஒழிப்பதில் ஒரு மிகப்பெரிய மாற்றத்தை ஏற்படுத்தும் என்று கல்வியாளர்கள் தெரிவித்துள்ளனர். இந்த அணுகுமுறை மலேசியாவை ஒரு ‘செயலற்ற’ (Reactive) நிலையிலிருந்து ‘முன்தடுப்பு’ (Preventive) மாதிரிக்கு மாற்றும் என்று அவர்கள் குறிப்பிட்டனர். அதாவது, ஒரு தவறான உள்ளடக்கம் பகிரப்பட்ட பிறகு நடவடிக்கை எடுப்பதற்குப் பதிலாக, அத்தகைய ஆபத்துகள் நேராமல் தொழில்நுட்ப நிறுவனங்களை முன்கூட்டியே தற்காப்பு நடவடிக்கைகளை எடுக்க இந்தச் சட்டம் கட்டாயப்படுத்தும். “வயது வரம்பு நிர்ணயம் மற்றும் வளர்ச்சி நிலைகளுக்கு ஏற்ப உள்ளடக்கங்களை ஒழுங்குபடுத்துவது குழந்தைகளின் டிஜிட்டல் ஆபத்துகளைக் குறைக்கும். இது மேட்டா (Meta) போன்ற உலகளாவிய தளங்கள் ஏற்கனவே அறிமுகப்படுத்தியுள்ள உணர்திறன் கொண்ட உள்ளடக்கத் திரையிடல் மற்றும் அறிமுகமில்லாத கணக்குகளுடனான தொடர்புகளைக் கட்டுப்படுத்தும் பாதுகாப்பு அம்சங்களுடன் ஒத்துப்போகிறது,” என்று கல்வியாளர்கள் தெரிவித்தனர். தகவல் தொடர்பு அமைச்சர் ஃபஹ்மி ஃபட்சில் கடந்த டிசம்பர் 4-ஆம் தேதி நாடாளுமன்றத்தில் பதிலளிக்கையில், 16 வயதிற்குட்பட்ட பயனர்கள் உள்ளடக்கங்களை அணுகுவதைத் தடுப்பதற்கான ஒழுங்குமுறை பணிகளில் அரசாங்கம் ஈடுபட்டுள்ளதாகத் தெரிவித்தார். மலேசியத் தகவல் தொடர்பு மற்றும் மல்டிமீடியா ஆணையம் (SKMM) அடுத்த ஆண்டு அமலுக்கு வரவுள்ள OnSA சட்டத்தின் கீழ் 10 துணைச் சட்டங்களை உருவாக்கி வருவதாகவும், அதில் குழந்தைகளின் ஆன்லைன் பாதுகாப்பிற்கு முன்னுரிமை அளிக்கப்படும் என்றும் கல்வியாளர்கள் கூறினர். பெற்றோர்களின் பங்கு மற்றும் பொறுப்பு
இதற்கிடையில், மலேசிய சைபர் நுகர்வோர் சங்கத்தின் (MCSC) தலைவர் சிராஜ் ஜலீல், அரசாங்கம் ஏன் இத்தகைய கட்டுப்பாடுகளைக் கொண்டுவருகிறது என்பதைப் பெற்றோர்கள் தங்கள் பிள்ளைகளுக்குத் தெளிவுபடுத்த வேண்டும் என்று அவர்கள் வலியுறுத்தினர். பல பெற்றோர்கள் தங்கள் பள்ளிச் செல்லும் பிள்ளைகளுக்குச் சமூக ஊடகக் கணக்குகளைத் தொடங்கி கொடுத்து, அவர்களை ‘இன்புளுயன்சர்களாக’ (Influencers) மாற்றுவதை அவர்கள் சுட்டிக்காட்டினர். “பிள்ளைகளைச் சமூக ஊடகங்களில் உலவவிடுவது பெற்றோர்களின் விருப்பமாக இருக்கலாம். ஆனால் OnSA சட்டம் அமலுக்கு வந்த பிறகு, இது ஒரு குற்றமாக மாறக்கூடும். பிள்ளைகளுக்காகப் போலியான அடையாளங்களை உருவாக்கி சமூக ஊடகங்களைப் பயன்படுத்த அனுமதிப்பது தவறான செயலாகும்,” என்று அவர்கள் எச்சரித்தனர். இந்தச் சட்டம் நடைமுறைக்கு வரும்போது, பயனர்களின் அடையாளத்தைச் சரிபார்க்கும் முறைகள் பலப்படுத்தப்படும். அப்போது பெற்றோர்கள் பிள்ளைகளின் வயதை மறைத்து கணக்குகளைத் தொடங்கி கொடுத்தால், அது சட்டப்படி குற்றமாகக் கருதப்படும் என்பது குறிப்பிடத்தக்கது.
