சிறார் இணையப் பாதுகாப்பு:சமூக ஊடகக் கணக்குத் தொடங்கும் வயதை 16 ஆக உயர்த்தும் முன்மொழிவுக்கு ஆதரவு! “பாதுகாப்பு, உரிமையை மீறாத தீர்வு” டத்தோ டி.முருகையா கருத்து

கோலாலம்பூர்,டிச.7- சமூக ஊடகக் கணக்குகளைத் தொடங்குவதற்கான குறைந்தபட்ச வயதை 16 ஆக உயர்த்தும் அரசாங்கத்தின் முன்மொழிவை ம.இ.கா தேசிய உதவித் தலைவர் டத்தோ டி.முருகையா கூறினார். இந்த நடவடிக்கை, குழந்தைகளின் ஆன்லைன் பாதுகாப்பை உறுதி செய்வதற்கான அவசரத் தேவை. இதில் 13 வயதுக்குட்பட்ட சிறார்களைப் பொருத்தவரை, அவர்களுக்கு இணையத்தில் நிலவும் அபாயங்கள் குறித்துக் கவலையளிக்கிறது என்று டத்தோ முருகையா சொன்னார்.  இளம் வயதிலேயே சமூக ஊடகங்களில் வெளிப்படுவது பாலியல் சுரண்டல், இணைய கொடுமைப்படுத்துதல் (cyberbullying) மற்றும் மனநலப் பிரச்சினைகள் உள்ளிட்ட பல ஆபத்துகளை விளைவிக்கிறது. குழந்தைகளின் டிஜிட்டல் நலன் மற்றும் உளவியல் முதிர்ச்சி ஆகியவற்றைக் கருத்தில் கொண்டு, இந்த வயதெல்லையை உயர்த்துவது மிகவும் பொருத்தமான முடிவு என்றும் அவர் கருத்துரைத்தார். வயதுச் சரிபார்ப்பில் நெறிமுறைகள் அவசியம். அரசாங்கம் முன்வைத்துள்ள eKYC எனும் மின்னணு அடையாளச் சரிபார்ப்பு வழிமுறையைப் பயன்படுத்தி வயதுச் சரிபார்ப்பை வலுப்படுத்துவது குறித்துப் பேசிய டத்தோ முருகையா, பாதுகாப்பு முயற்சிகள் ஒருபோதும் குழந்தைகளின் அடிப்படை உரிமைகளை மறுக்கக்கூடாது என்றும் வலியுறுத்தினார். “சமூக ஊடக அணுகலை நாம் மட்டுப்படுத்தும்போது, குழந்தைகளின் கருத்து சுதந்திரம் (Freedom of Expression) அல்லது தகவல் அணுகல் உரிமை ஆகியவற்றில் எதிர்மறையான தாக்கத்தை ஏற்படுத்திவிடக் கூடாது. எனவே, வயதுச் சரிபார்ப்பு நடைமுறைகள் நெறிமுறைகளுடன் (ethically) செயல்படுத்தப்படுவதை உறுதி செய்ய வேண்டும்,” என்று அவர் தெரிவித்தார். பொறுப்பு மற்றும் கண்காணிப்பின் தேவை இந்த முக்கியமான காலகட்டத்தில், குழந்தைகளின் உரிமைகளைப் பாதுகாக்கும் சுதந்திர அமைப்புகளின் பங்கு மிக முக்கியமானது என்றும் அவர் குறிப்பிட்டார்.  ஆன்லைன் பாதுகாப்பை உறுதி செய்வதற்கான நடவடிக்கைகளைச் செயல்படுத்தும்போது, அது குழந்தைகளின் உரிமைகளை மீறவில்லை என்பதையும், அது மிகவும் நெறிமுறையான முறையில் செயல்படுத்தப்படுவதையும் கண்காணித்து உறுதி செய்வது அத்தகைய அமைப்புகளின் கடமையாகும். குறிப்பாக, 16 வயதுக்குட்பட்டவர்கள் கணக்குகளைத் தவிர்க்கப் பெற்றோரின் கணக்கைப் பயன்படுத்துவது போன்ற நடைமுறைச் சவால்களுக்குத் தீர்வு காண, பெற்றோர்கள் மற்றும் கல்வியாளர்களுக்கான டிஜிட்டல் கல்வியறிவை அதிகரிக்க வேண்டும் என்றும் அவர் கேட்டுக்கொண்டார். குழந்தைகளின் ஆன்லைன் நலன் மற்றும் பாதுகாப்பு ஆகியவை நாட்டின் எதிர்காலத்திற்கு மிகவும் இன்றியமையாதது என்பதால், இந்தத் திட்டத்தை வெற்றிகரமாகச் செயல்படுத்த அனைத்துத் தரப்பினரின் ஒத்துழைப்பும் தேவை என டத்தோ டி.முருகையா வலியுறுத்தினார்.